Upplýsingatækni

QR kóðar með jólalögum

Það er partur af eTwinningverkefninu okkar í Álfaheiði Children at the Opera að útbúa QR kóða sem að baki er tilvísun í jólalög á YouTube. Börnin eru búin að útbúa slíka kóða og hengja út um leikskólann. Núna geta allir skannað kóðana og brostið í söng. Nokkur börn sóttu hljóðfæri í morgun til þess að spila undr á ganginum. Bara gaman að þessu. Foreldrar eru einnig hvattir til að stoppa við kóðana og taka undir í söng.

Upplýsingatækni

Hour of Code

Í morgun tókum við á Hjalla í leikskólananum Álfaheiði þátt í heimsviðburði, Klukkustund í forritun eða Hour of Code. Við gerðum þetta með okkar hætti, höfðum fjórar smiðjur með mismunandi viðfangsefnum, CodeKarts, Bee-Bot, Robot Mouse og svo Lazy Monster. CodeKarts er smáforrit í iPad þar sem börnin læra með einföldum hætti að forrtita. Það er kappakstursbíll sem þau verða að gefa skipanir um hvar skal aka. Þetta var í fyrsta sinn sem börnin prófuðu þetta forrit og stóðu sig alveg sérlega vel. Bee-Bot og Robot Mouse þekkja börnin vel, þetta eru forritunarleikföng sem við höfum verið að leika okkur með áður. Af því að það er ekki hægt að ætlast til að börn á þessum aldri sitji lengi við í einu þá var ein smiðjan fjörug, með Lazy Monster smáforritinu. Þetta er smáforrit þar sem lata skrýmslið biður börnin að gera æfingar og svo anda djópt inn á milli. Við vorum með diskóperu í gangi til þess að gera þetta skemmtilegra. Þessi klukkustund í forritun var sérlega vel heppnuð og höfðu mjög margir á orði að þeir vildu gera þetta oftar. Við settum saman myndir og myndbrot frá viðburðinum hér.

Upplýsingatækni

OSMO í kennslu

Unnur Valgeirsdóttir opnaði nýlega frábæran vef fyrir kennara um forritunarverkfærin OSMO. Osmo er margverðlaunað leikja- og kennslutæki fyrir iPad og iPhone. Til að geta notað Osmo þarf að kaupa stand (base) fyrir iPad eða iPhone og honum fylgir lítill spegill sem settur er yfir myndavélina. Spegillinn nemur það sem gert er fyrir framan skjáinn hvort sem það er með penna, hreyfingu, kubbum, bók- eða tölustöfum.

Forritin sem fylgja tækinu eru ókeypis og þau er hægt að sækja á App Store.

Hægt er að spila margskonar leiki: Coding Awbie, Coding Duo, Coding Jam, Detective Agency, Hot Wheels Mindracers, Masterpiece, Monster, Newton, Numbers, Pizza Co., Super Studio, Tangram og Words. Feitletruðu leikina er einungis hægt að spila með því að kaupa pakka með aukahlutum. Auðvelt er að setja Osmo upp og byrja að nota leikina.

Það sem gerir Osmo leikina sérstaka er að í þeim er leikið með áþreifanlega hluti, notandinn handleikur kubba, tölu- og bókstafi, skriffæri og fleira til að hafa áhrif á það sem gerist á skjánum. Í leikjunum er m.a. hægt að púsla saman myndum úr formum, vinna með stafi, orð og tölur, þjálfa fínhreyfingar og rökhugsun, forrita, teikna, skapa og gera tilraunir.

Osmo er hannað fyrir börn á aldrinum frá 5-13 ára en bæði yngri og eldri einstaklingar hafa gaman af að spreyta sig. Leikirnir efla hreyfifærni, skilningarvitin og sköpun auk þess sem þeir þjálfa rökhugsun, hljóðkerfisvitund, orðaforða, stærðfræði, samvinnu og samskipti.

Takk kærlega Unnur fyrir frábæran vef.

Upplýsingatækni, Útikennsla

Upplýsingatækni með ungum börnum

Ég hef verið svo heppin í nokkur ár að fá að koma inn á námskeiðið Umhverfi sem uppspretta náms hjá þeim Kristínu Norðdahl og Guðbjörgu Pálsdóttur. Mitt hlutverk er að segja frá þeim möguleikum sem upplýsingatæknin hefur í leikskólastarfi. Ég legg áherslu á náttúrufræði, útikennslu, stærðfræði og forritun með ungum börnum. Það er alltaf jafn gaman að hitta verðandi leikskólakennara, áhugasamari nemendur fær maður ekki. Það er líka svo gaman að verða vitni að svona „AHA“ augnablikum þegar fólk uppgötvar hvað hægt er að gera með upplýsingatækni með þetta ungum börnum. Í dag bað ég dóttur mína Sunnevu Svavarsdóttur um að koma með mér, en hún er þessar vikurnar að aðstoða við þróunarverkefni í leikskólanum Reynisholti í Grafarholti. Verkefni sem snýst um að nýta upplýsingatækni í námi og kennslu yngstu barnanna í leikskólanum. Sunneva er með mikið af tæknibúnaði í láni frá Mixtúru og er að kynna fyrir starfsfólki leikskólans. Það kom nemunum í dag verulega á óvart hvað það til er mikið af allskonar forritunarleikföngum sem hægt er að nota með ungum börnum.

Upplýsingatækni

Ljósmyndavandræði HEIC

Eftir síðustu uppfærslu á iPhone símanum mínum fór að bera á vandræðum með sniðið á ljósmyndunum sem ég tók á hann. Síminn fór allt í einu að taka ljósmyndir með HEIC sniði í staðinn fyrir JPEG. Þetta olli þeim leiðindum að þegar ég ætlaði að setja ljósmyndirnar inn á heimasíður þá vildu þær ekki sjá þetta snið. Ég ákvað að „googla“ og sjá hvað væri til ráða og viti menn, þetta voru þekkt vandræði. Leitin skilaði mér þessari síðu þar sem mér var leiðbeint hvernig ég gæti leiðrétt símann og svo einnig þessari síðu þar sem ég gat „convertað“ myndirnar yfir í JPEG. Set þetta hér inn bara svona ef einhverjir fleiri lenda í þessum vandræðum.

Samfélagsmiðlar, Samspil 2018, Upplýsingatækni

Samspil 2018

Í gær hófst formlega Samspil 2018. Samspil 2018 er starfsþróunarátak þar sem blandast saman fræðsla, samstarf og samnýting þekkingar og reynslu þeirra sem starfa í skólum í skemmtilegu og aðgengilegu námsumhverfi. Að þessu átaki standa Menntamiðja, Samstarfsráð um starfsþróun kennara og skólastjórnenda og stýrihópur um úttekt á menntun fyrir alla. Einnig koma að verkefninu fjöldi sérfræðinga, fræðimanna og reynslubolta úr skólum og víðar.
Fræðslan fer að mestu fram á netinu og þátttakendur fá að kynnast því hvernig samfélagsmiðlar og tengslanet stuðla að uppbyggilegri og áframhaldandi starfsþróun. Síðdegis í gær var fræðslufundur um Samspil 2018 haldinn á Menntavísindasviði HÍ og mætti ég þangað til þess að vera með frá upphafi. Samspil 2018 er sjálfstætt framhald af Samspil 2015 sem ég tók þátt í og hafði bæði gagn og gaman af. Markmið Samspils 2018 er að þátttakendur fræðist um starfsþróun og nýjar kennsluaðferðir og námstækni fyrir fjölbreytta nemendahópa um leið og þeir taka þátt í að byggja upp öflug og kvik starfssamfélög skólafólks á netinu og í raunheimum. Hægt verður að skrá sig í Samspil 2018 hvenær sem er og taka eins mikið þátt og hver og einn vill. Dagskráin verður kynnt á næstu dögum og borgar sig að vera vel upplýstur bæði inni í Fésbókarhóp Samspil 2018 og svo á Twitter undir millumerkinu #samspil2018 
Í gær kynnti ég fyrir þátttakendum hvar hér á síðunni má finna upplýsingar um hvernig nota á samfélagsmiðla, Fésbók, Twitter, Tweetdeck og Pinterest og vona ég að það efni komi að notum. Ég hlakka til að læra og deila með öðrum kennurum á Samspil 2018.

Upplýsingatækni

Vatnsendaskóli

Það var mjög fjölmennt á viðburðinum #kopmennt Menntabúðum í Vatnsendaskóla núna síðdegis. Ég hefði gjarnan viljað hitta leikskólakennara þarna, en þeir eru því miður enn við störf í leikskólanum þegar #kopmennt hófst kl. 15. Ég kynnti námsvefinn minn Fikt, fékk mér kaffi og ávexti og spjallaði við kollega mína úr ýmsum grunnskólum Kópavogs, Garðarbæjar og Breiðholts. Svo gafst mér tækifæri á að líta inn í unglingadeildina og þar er heldur betur búið að aðlaga skólastofur að breyttum kennsluháttum. Mjög notalegt hjá unglingunum á Vatnsenda.

Samfélagsmiðlar, Upplýsingatækni

Menntabúðir

Í næstu viku verða bara haldnar menntabúðir dag eftir dag. Mánudaginn 29. október kl. 15 verða haldnar menntabúðir #Kópmennt í Vatnsendaskóla í Kópavogi. Þar ætla ég m.a. að kynna Fikt námsvefinn minn. Það er í fyrsta sinn sem ég kynni hann á heimavelli og vona ég að leikskólakennarar láti sjá sig. Hingað til hafa þeir ekki mætt mikið á #Kópmennt, en það má vera að tímasetning menntabúðanna hennti illa fyrir þá.
Þriðjudaginn 30. október kl. 16:15 á Menntavísindasviði HÍ verða haldnar menntabúðir á vegum Upplýsingatæknitorgs, Menntavísindasviðs HÍ, RannUm, Skóla- og frístundasviðs Reykjavíkurborgar og Skrifstofu fræðslu- og frístundaþjónustu Hafnarfjarðar. Vel má vera að ég taki þátt í þeim menntabúðum líka, en þá með eitthvað annað viðfangsefni.

Menntabúðir (e. EduCamp) er starfsþróun á jafningjagrundvelli. Aðferðin byggir á óformlegri jafningjafræðslu sem stuðlar að aukinni umræðu á milli skólastiga sem og eflingu tengslanets kennara. Þátttakendur miðla af eigin reynslu og þekkingu og afla sér fróðleiks frá öðrum. Menntabúðir eru opnar öllum en sérstaklega miðaðar að starfandi kennurum á öllum skólastigum sem og kennaranemum.

Þátttakendur geta mætt með umfjöllunarefni sem þeir brenna fyrir eða hafa áhuga á, en einng hefur verið vinsælt að koma með „vandamál“ og fá aðstoð við að leysa það.

Þátttakendur eru beðnir um að koma með framlag í búðirnar. Framlög geta verið margbreytileg, t.d. að segja frá kennsluhugmynd, vefsíðu, forriti, smáforriti, námskrárvinnu, varpa fram spurningu eða koma með eitthvað málefni sem þarfnast lausnar.

Ekki er ætlast til að allir komi með framlag. Þátttaka er ókeypis en gert er ráð fyrir virkri þátttöku. Með virkri þátttöku er átt við að ganga á milli stöðva, spjalla og spyrja spurninga. Hér má sjá myndband sem Bjarndís Fjóla Jónsdóttir útbjó eftir eina menntabúð á Menntavísindasviði HÍ.

Samfélagsmiðlar, Upplýsingatækni

eTwinning netráðstefna- Cultural Heritage

Á laugardaginn 20. október tók ég þátt í netráðstefnu á vegum eTwinning. Í ár er þema eTwinning Cultural Heritage eða menningararfurinn. Á ráðstefnunni voru kynnt fjölmörg eTwinning verkefni sem öll áttu það sameiginlegt að fjalla á einhvern hátt um menningararfinn. Það var afar áhugavert að hlusta á þá sem töluðu og mér fannst með ólíkindum hversu fjölbreytt verkefnin voru og hugsaði oft til þess hversu frábært það væri að geta sem kennari myndað samstarf við aðra kennara úti í veröldinni. Ég fékk margar góðar hugmyndir sem ég held að geti nýst mér í starfi mínu sem leikskólakennari. Nokkrir kennarar voru búnir að setja upp verkefni sem þeir vilja vinna að á þessu skólaári, en vantaði samstarfsfélaga. Ég reyndi eftir fremsta megni að deila efni ráðstefnunnar jafnóðum með íslenskum kennurum. Gerði það bæði á Facebook og Twitter undir myllumerkjunum #etwinning og #menntaspjall. Vonandi hefur einhver íslenskur kennari áhuga á að bætast í hópinn. Hér fyrir neðan er ljósmynd sem vakið hefur hvað mesta athygli, en þetta er endurnýting á CD diskum. Þarna er ofið utanum diskana með litríku garni, hugmynd sem kom frá Afríku.

Sérkennsla, Upplýsingatækni

Myndir lifna við

Það kemur fyrir að hvetja þarf sérstaklega einstaka börn í leikskólanum til þess að efla fínhreyfingar sínar, þau eru t.d. ekki alveg búin að ná aldurssvarandi gripi um skriffæri. Í morgun ákvað ég að nota upplýsingatæknina sem hvata til þess að fá nokkur börn til þess að lita fyrir mig myndir. Börnin voru afar misjafnlega á vegi stödd hvað varðar fínhreyfifærni, en það kom ekki að sök því öll fengu þau að sjá myndirnar sínar lifna við með aðstoð smáforritsins Quiver (ókeypis) og það fannst þeim nú ekki leiðinlegt. Það er alltaf jafngaman fyrir mig sem kennara að fylgjast með undrun barnanna þegar fuglinn þeirra, bíllinn og fl. fara á hreyfingu. Hér á heimasíðu Quiver er hægt að prenta út myndir til þess að lita.