Upplýsingatækni

Kennsluráðgjöf

Ég hef í nokkur ár fylgst með Ingva Hrannari Ómarssyni sem er kennsluráðgjafi í Skagafirði. Ingvi Hrannar heldur úti áhugaverðri heimasíðu og þar birtir hann eitt og annað um upplýsingatækni. Í dag skrifaði hann um breytingar á starfi sínu sem kennsluráðgjafi. Hann ætlar að prófa á vormánuðum að vera meira inni í skólastofu hjá kennurum og aðstoða þá við að breyta kennsluháttum sínum. Mér líst rosalega vel á þetta hjá honum, en það er einmitt mín reynsla að kennarar vilja hafa ráðgjafa til staðar, það veitir þeim öryggi og áræðni til þess að prófa hluti sem þeir hafa ekki gert áður. Oft upplifði ég það í minni vinnu að það að sitja fyrir aftan kennara var nóg þess það þeir þorðu að prófa sig áfram í tölvunni. Stundum höfðu þeir það á orði að forritin virkuðu betur ef ég væri í herberginu, hversu undarlega sem það hljómar. Allavega þá mæli ég með því að allir sem hafa áhuga á upplýsingatækni og breyttum kennsluháttum fylgi eftir bloggi Ingva Hrannars.

Upplýsingatækni

Uppáhalds

Uppáhalds bloggarinn minn er Ingileif Ástvaldsdóttir skólastjóri Þelamerkurskóla. Ingileif heldur úti blogginu Bara byrja og fjallar um allt mögulegt. Ingileif á mörg áhugamál, en upplýsingatækni í skólastarfi er eitt af áhugamálum hennar. Hún kemur með margar ábendingar um áhugaverð smáforrit og það sem ekki er verra að hún prófar þau sjálf áður en hún mælir með þeim. Það er afar áhugavert að fylgjast með því hvernig hún finnur notagildi hvers smáforrits og vegna áhuga hennar þá smitast ég og reyni sjálf að finna út úr því hvort ég geti notað viðkomandi smáforrit í minni kennslu í leikskólanum.