Upplýsingatækni

Íslenskan og snjalltækin

Sigríður Sigurjónsdóttir, prófessor í íslenskri málfræði við Háskóla Íslands var í viðtali á RÚV í gær. Þar var fjallað um viðamikla rannsókn á áhrifum tæknibreytinga á stöðu og framtíð íslenskrar tungu og hve mikil áhrif enskunnar eru. Kannað var hversu snemma börn byrja að nota netið. Árið 2013 byrjuðu 2% barna að nota netið fyrir þriggja ára aldur. En núna eru 58% barna byrjuð að nota tölvur og snjalltæki tveggja ára og yngri. „Og átta prósent þeirra byrjuðu að nota snjalltæki og tölvur fyrir eins árs aldur,“ segir Sigríður.

Nú sé ég ástæðu til að vitna í sjálfa mig. „Það er mikilvægt að ung börn verði ekki einungis neytendur stafræns efnis í tækjunum og noti þau sér til afþreyingar, heldur læri þau að nýta þennan búnað sem verkfæri og námstæki til að afla þekkingar, vinna úr alls konar efni, búa til stafrænt efni og deila því með öðrum. Þannig má minnka þau áhrif sem enskt málumhverfi í smáforritum hefur á málþroska ungra barna hér á landi og efla málnotkun og málþroska með ýmsu móti um leið og stuðlað er að auknum þroska og námi á mörgum fleiri sviðum.“

Hvar annars staðar en í leikskólanum þar sem börnin dvelja nánast allan sinn vökutíma eru meiri tækifæri til þess að viðhalda íslenskri tungu. Það þurfa allir að fara að vakna, ekki bara foreldrar barnanna heldur leikskólakennarar, sveitarfélög og menntayfirvöld sem setja stefnuna. Leikskólarnir geta gefið ungum börnum tækifæri til að fást við hvetjandi og örvandi viðfangsefni. Tæknin getur ýtt undir sköpunarkraft barnanna og forvitni, tjáningu og fróðleiksfýsn þeirra. Með uppbyggilegri og markvissri tækninotkun er hægt að búa börnin undir nám og þátttöku í tæknivæddu samfélagi.

Frændur okkar í Noregi eru vaknaðir og hafin er markviss starfsþróun fyrir allt starfsfólk leikskólanna til þess að efla það í færni og þekkingu á notkun upplýsingatækni í skólastarfinu. Markmiðið er að allir í leikskólanum hafi hæfileika til þess að kenna börnum að takast á við tækni til framtíðar. Hægt er m.a. að fylgjast með þessu metnaðarfulla starfi á vefsíðunni Digital Arena Barnehagen. 

Nú kalla ég eftir aðgerðum, við getum ekki bara lokað augunum og haldið áfram að moka peningum í sérkennslu í von um að börnin læri íslensku „einhvern tímann“ síðar, kannski í grunnskólanum. Við hefðum átt að vera fyrir löngu byrjuð að takast á við þetta viðfangsefni.

Upplýsingatækni

QR kóðar með jólalögum

Það er partur af eTwinningverkefninu okkar í Álfaheiði Children at the Opera að útbúa QR kóða sem að baki er tilvísun í jólalög á YouTube. Börnin eru búin að útbúa slíka kóða og hengja út um leikskólann. Núna geta allir skannað kóðana og brostið í söng. Nokkur börn sóttu hljóðfæri í morgun til þess að spila undr á ganginum. Bara gaman að þessu. Foreldrar eru einnig hvattir til að stoppa við kóðana og taka undir í söng.

Upplýsingatækni

Hour of Code

Í morgun tókum við á Hjalla í leikskólananum Álfaheiði þátt í heimsviðburði, Klukkustund í forritun eða Hour of Code. Við gerðum þetta með okkar hætti, höfðum fjórar smiðjur með mismunandi viðfangsefnum, CodeKarts, Bee-Bot, Robot Mouse og svo Lazy Monster. CodeKarts er smáforrit í iPad þar sem börnin læra með einföldum hætti að forrtita. Það er kappakstursbíll sem þau verða að gefa skipanir um hvar skal aka. Þetta var í fyrsta sinn sem börnin prófuðu þetta forrit og stóðu sig alveg sérlega vel. Bee-Bot og Robot Mouse þekkja börnin vel, þetta eru forritunarleikföng sem við höfum verið að leika okkur með áður. Af því að það er ekki hægt að ætlast til að börn á þessum aldri sitji lengi við í einu þá var ein smiðjan fjörug, með Lazy Monster smáforritinu. Þetta er smáforrit þar sem lata skrýmslið biður börnin að gera æfingar og svo anda djópt inn á milli. Við vorum með diskóperu í gangi til þess að gera þetta skemmtilegra. Þessi klukkustund í forritun var sérlega vel heppnuð og höfðu mjög margir á orði að þeir vildu gera þetta oftar. Við settum saman myndir og myndbrot frá viðburðinum hér.

Upplýsingatækni, Útikennsla

Upplýsingatækni með ungum börnum

Ég hef verið svo heppin í nokkur ár að fá að koma inn á námskeiðið Umhverfi sem uppspretta náms hjá þeim Kristínu Norðdahl og Guðbjörgu Pálsdóttur. Mitt hlutverk er að segja frá þeim möguleikum sem upplýsingatæknin hefur í leikskólastarfi. Ég legg áherslu á náttúrufræði, útikennslu, stærðfræði og forritun með ungum börnum. Það er alltaf jafn gaman að hitta verðandi leikskólakennara, áhugasamari nemendur fær maður ekki. Það er líka svo gaman að verða vitni að svona „AHA“ augnablikum þegar fólk uppgötvar hvað hægt er að gera með upplýsingatækni með þetta ungum börnum. Í dag bað ég dóttur mína Sunnevu Svavarsdóttur um að koma með mér, en hún er þessar vikurnar að aðstoða við þróunarverkefni í leikskólanum Reynisholti í Grafarholti. Verkefni sem snýst um að nýta upplýsingatækni í námi og kennslu yngstu barnanna í leikskólanum. Sunneva er með mikið af tæknibúnaði í láni frá Mixtúru og er að kynna fyrir starfsfólki leikskólans. Það kom nemunum í dag verulega á óvart hvað það til er mikið af allskonar forritunarleikföngum sem hægt er að nota með ungum börnum.

Upplýsingatækni

Vatnsendaskóli

Það var mjög fjölmennt á viðburðinum #kopmennt Menntabúðum í Vatnsendaskóla núna síðdegis. Ég hefði gjarnan viljað hitta leikskólakennara þarna, en þeir eru því miður enn við störf í leikskólanum þegar #kopmennt hófst kl. 15. Ég kynnti námsvefinn minn Fikt, fékk mér kaffi og ávexti og spjallaði við kollega mína úr ýmsum grunnskólum Kópavogs, Garðarbæjar og Breiðholts. Svo gafst mér tækifæri á að líta inn í unglingadeildina og þar er heldur betur búið að aðlaga skólastofur að breyttum kennsluháttum. Mjög notalegt hjá unglingunum á Vatnsenda.

Samfélagsmiðlar, Upplýsingatækni

Menntabúðir

Í næstu viku verða bara haldnar menntabúðir dag eftir dag. Mánudaginn 29. október kl. 15 verða haldnar menntabúðir #Kópmennt í Vatnsendaskóla í Kópavogi. Þar ætla ég m.a. að kynna Fikt námsvefinn minn. Það er í fyrsta sinn sem ég kynni hann á heimavelli og vona ég að leikskólakennarar láti sjá sig. Hingað til hafa þeir ekki mætt mikið á #Kópmennt, en það má vera að tímasetning menntabúðanna hennti illa fyrir þá.
Þriðjudaginn 30. október kl. 16:15 á Menntavísindasviði HÍ verða haldnar menntabúðir á vegum Upplýsingatæknitorgs, Menntavísindasviðs HÍ, RannUm, Skóla- og frístundasviðs Reykjavíkurborgar og Skrifstofu fræðslu- og frístundaþjónustu Hafnarfjarðar. Vel má vera að ég taki þátt í þeim menntabúðum líka, en þá með eitthvað annað viðfangsefni.

Menntabúðir (e. EduCamp) er starfsþróun á jafningjagrundvelli. Aðferðin byggir á óformlegri jafningjafræðslu sem stuðlar að aukinni umræðu á milli skólastiga sem og eflingu tengslanets kennara. Þátttakendur miðla af eigin reynslu og þekkingu og afla sér fróðleiks frá öðrum. Menntabúðir eru opnar öllum en sérstaklega miðaðar að starfandi kennurum á öllum skólastigum sem og kennaranemum.

Þátttakendur geta mætt með umfjöllunarefni sem þeir brenna fyrir eða hafa áhuga á, en einng hefur verið vinsælt að koma með „vandamál“ og fá aðstoð við að leysa það.

Þátttakendur eru beðnir um að koma með framlag í búðirnar. Framlög geta verið margbreytileg, t.d. að segja frá kennsluhugmynd, vefsíðu, forriti, smáforriti, námskrárvinnu, varpa fram spurningu eða koma með eitthvað málefni sem þarfnast lausnar.

Ekki er ætlast til að allir komi með framlag. Þátttaka er ókeypis en gert er ráð fyrir virkri þátttöku. Með virkri þátttöku er átt við að ganga á milli stöðva, spjalla og spyrja spurninga. Hér má sjá myndband sem Bjarndís Fjóla Jónsdóttir útbjó eftir eina menntabúð á Menntavísindasviði HÍ.

Sérkennsla, Upplýsingatækni

Myndir lifna við

Það kemur fyrir að hvetja þarf sérstaklega einstaka börn í leikskólanum til þess að efla fínhreyfingar sínar, þau eru t.d. ekki alveg búin að ná aldurssvarandi gripi um skriffæri. Í morgun ákvað ég að nota upplýsingatæknina sem hvata til þess að fá nokkur börn til þess að lita fyrir mig myndir. Börnin voru afar misjafnlega á vegi stödd hvað varðar fínhreyfifærni, en það kom ekki að sök því öll fengu þau að sjá myndirnar sínar lifna við með aðstoð smáforritsins Quiver (ókeypis) og það fannst þeim nú ekki leiðinlegt. Það er alltaf jafngaman fyrir mig sem kennara að fylgjast með undrun barnanna þegar fuglinn þeirra, bíllinn og fl. fara á hreyfingu. Hér á heimasíðu Quiver er hægt að prenta út myndir til þess að lita.

Upplýsingatækni

Alþjóðadagur kennara

Alla jafna hefði ég sett inn á samfélagsmiðla færslur úr leikskólastarfinu í dag, en núna vildi svo til að ég var með fullorðins nemendur. Annasamri viku lokaði ég með því að bruna á Húnavelli í Austur Húnavatnssýslu. Þar var mikið fjör og mikið gaman á haustþingi 5 deildar FL. Ég var með tvær vinnustofur þar sem ég kynnti Fikt og kenndi á þrjú smáforrit, Chatter Pix Kids, Puppet Pals og svo Book Creator. Nemendur mínir voru sérlega áhugasamir og skemmtilegt að kenna þeim. Takk kærlega fyrir mig.

Upplýsingatækni, Útikennsla

Upplýsingatækni í Furugrund

Þvílíkt líf og fjör í morgun þegar boðið var upp á smiðjuvinnu í leikskólanum Furugrund kl. 9-10:30. Boðið var upp á átta smiðjur, tveir kennarar voru með hverja smiðju fyrir sig og börnin fóru á milli 3-4 saman, þannig fór hvert og eitt barn í þrjár smiðjur á eldri deildunum. Sjö barna hópur pilta fór í ratleik í Fossvogi með aðstoða QR kvóða líkt og stúlkurnar fóru í síðustu viku. Á yngri deildunum var boðið upp á jóga og núvitund með 2-3 ára börnum. Á eldri deildunum var boðið upp á OSMO í fernskonar viðfangsefnum, Roboat Mouse í þremur útgáfum, hreyfimyndagerð með Stop MotionMakey Makey, Chatter Pix smáforritið og Let‘s go Code. Gestirnir sem öll eru leikskólakennarar voru afar áhugasamir og fannst það stórkostlegt hversu fjölbreytt verkefni var hægt að bjóða börnunum upp á. Gestirnir sem fóru í ratleikinn í Fossvogi voru líka mjög ánægðir og höfðu ekki upplifað slíkt áður. Allir gestirnir sem voru inni í leikskólanum höfðu tækifæri á að horfa einnig á yngri börnin í núvitund og jóga. Það fannst þeim stórkostlegt. Börnin, já börnin þau skemmtu sér konunglega og höfðu orð á því hversu gaman hefði verið og sum þeirra voru sérlega stolt af eigin afrekum, sérstaklega í hreyfimyndagerðinni. Hér er ein hreyfimynd Risaeðluheimilið og önnur sem heitir SMASH!